صحت مند کولیسٹرول الزائمر کے خطرات میں اضافہ کرسکتا ہے، تحقیق

یونیورسٹی آف پٹسبرگ اسکول آف پبلک ہیلتھ کی حالیہ تحقیق میں انکشاف کیا گیا ہے کہ اچھے کولیسٹرول (HDL-C) کی زیادہ مقدار مینوپاز کے بعد خواتین میں الزائمر کے خطرے میں اضافہ کر سکتی ہے۔ یہ تحقیق جرنل آف کلینکل اینڈوکرینولوجی اینڈ میٹابولزم میں شائع ہوئی ہے۔

محققین نے 503 خواتین کے خون کے نمونوں کا طویل المدتی تجزیہ کیا اور بتایا کہ مینوپاز کے بعد صرف ایچ ڈی ایل کولیسٹرول کی مقدار نہیں بلکہ اس کا معیار زیادہ اہم ہو جاتا ہے۔ عمر بڑھنے کے ساتھ ایچ ڈی ایل کے ذرات کا معیار کم ہو سکتا ہے، جو دماغی صحت پر منفی اثر ڈالنے کا باعث بنتا ہے۔

تحقیق کے مطابق وقت کے ساتھ خون میں بڑے سائز کے ایچ ڈی ایل ذرات کی تعداد بڑھ جاتی ہے، مگر یہ چھوٹے ذرات کے مقابلے میں کم مؤثر ثابت ہوتے ہیں۔ 2000 سے 2016 کے دوران خواتین کی یادداشت اور ذہنی صلاحیتوں کے جائزے سے یہ بات سامنے آئی کہ جن خواتین میں چھوٹے ایچ ڈی ایل ذرات اور فاسفولیپڈز (صحت مند چکنائی) کی مقدار زیادہ تھی، انہوں نے عمر بڑھنے کے باوجود یادداشت کے ٹیسٹ میں بہتر کارکردگی دکھائی۔

ماہرین کے مطابق فاسفولیپڈز دماغی خلیات کو صحت مند رکھنے میں اہم کردار ادا کرتے ہیں۔ تحقیق کے سربراہ ڈاکٹر سمر کا کہنا ہے کہ یادداشت میں کمی الزائمر کی ابتدائی علامات میں شامل ہے، تاہم صحت مند عادات—جیسے باقاعدہ ورزش، متوازن غذا، صحت مند وزن برقرار رکھنا اور سگریٹ نوشی سے پرہیز—ایچ ڈی ایل ذرات کے بہتر کام میں مدد دے سکتی ہیں۔