خواجہ عمران نذیر کا میاں چنوں ہسپتال کا اچانک دورہ، 10 ڈاکٹرز کی تعیناتی کا اعلان

صوبائی وزیر صحت خواجہ عمران نذیر نے تحصیل ہیڈ کوارٹرز (THQ) ہسپتال اور رورل ہیلتھ سینٹر (RHC) تلمبہ کا اچانک دورہ کیا اور ایمرجنسی، فارمیسی، ایکسرے روم سمیت سروس ڈیلیوری کا تفصیلی جائزہ لیا۔ دورے کے دوران صوبائی وزیر نے زیر علاج مریضوں اور ان کے لواحقین سے ملاقات کر کے طبی سہولیات کی فراہمی سے متعلق براہ راست فیڈ بیک حاصل کیا۔ خواجہ عمران نذیر نے تحصیل ہسپتال کے لیے مزید ۱۰ ڈاکٹرز کی تعیناتی، جلد سی ٹی اسکین مشین کی فراہمی اور خانیوال میں رواں سال جدید کیتھ لیب (Cath Lab) قائم کرنے کا اعلان کیا۔ انہوں نے ہسپتال کے سویپرز اور سیکیورٹی گارڈز کو درپیش دیرینہ مسئلے پر تین روز کے اندر تنخواہیں دلانے کی یقین دہانی بھی کرائی۔ مریضوں کے بڑھتے ہوئے رش کے پیشِ نظر انہوں نے آر ایچ سی تلمبہ کو اپ گریڈ کرنے کا اعلان کرتے ہوئے واضح کیا کہ وزیراعلیٰ پنجاب مریم نواز شریف کی ہدایت پر صوبے کے دور دراز علاقوں میں صحت کی بہترین سہولیات فراہم کی جا رہی ہیں اور سروس ڈیلیوری میں کسی بھی قسم کی غفلت برداشت نہیں کی جائے گی۔