ہیئر ایکسٹینشنز میں سرطان سے جڑے کیمیکلز کی موجودگی کا انکشاف

بالوں کو گھنا اور پرکشش بنانے کے لیے استعمال ہونے والی ہیئر ایکسٹینشنز میں صحت کے لیے نقصان دہ کیمیکلز کی موجودگی سامنے آئی ہے، جو کینسر اور دیگر سنگین مسائل سے منسلک ہو سکتے ہیں۔

امریکی ریاست میساچوسیٹس میں قائم سائلنٹ اسپرنگ انسٹیٹیوٹ کی تحقیق کے مطابق، آن لائن فروخت ہونے والی 43 مشہور مصنوعات میں فلیم ریٹارڈنٹس، فیتھالیٹس، کیڑے مار ادویات، اسٹائرین، ٹیٹراکلوروایتھین اور آرگینو ٹنز جیسے خطرناک مادے پائے گئے۔

تحقیقی ٹیم کی سربراہ ڈاکٹر الیسیا فرینکلن کے مطابق، یہ کیمیکلز براہِ راست سر اور گردن کے قریب لگائے جاتے ہیں، اور اسٹائلنگ کے دوران فضا میں شامل ہو کر سانس کے ذریعے جسم میں داخل ہو سکتے ہیں، جس سے صحت پر منفی اثرات مرتب ہو سکتے ہیں۔

ماہرین نے صارفین کو مشورہ دیا ہے کہ وہ کیمیکل سے پاک یا تصدیق شدہ محفوظ ہیئر ایکسٹینشنز کو ترجیح دیں اور فیشن کے دوران اپنی صحت کو خطرے میں نہ ڈالیں۔