حکومت اور ویزا سیمیا کا پاکستان میں ڈیجیٹل ادائیگیوں کے فروغ پر اتفاق

وفاقی وزیر خزانہ محمد اورنگزیب کی ویزا سیمیا کی قیادت سے اہم ملاقات ہوئی جس میں پاکستان میں ڈیجیٹل ادائیگیوں کے فروغ اور مالی شمولیت کو بڑھانے پر تفصیلی تبادلۂ خیال کیا گیا۔

ملاقات میں وزیر خزانہ نے کہا کہ ڈیجیٹل پیمنٹس اور مالی شمولیت حکومت کی اہم ترجیحات میں شامل ہیں۔ انہوں نے بتایا کہ آئی ایم ایف پروگرام کے تحت معاشی استحکام میں نمایاں پیشرفت ہوئی ہے، جس کی عالمی کریڈٹ ریٹنگ ایجنسیوں نے بھی توثیق کی ہے۔

محمد اورنگزیب نے کہا کہ حکومت ڈیجیٹل انفراسٹرکچر کو مضبوط بنانے کے لیے کوشاں ہے اور سرکاری ادائیگیوں کی ڈیجیٹلائزیشن سے شفافیت اور کارکردگی میں بہتری آئے گی۔ ان کے مطابق پاکستان ڈیجیٹل اتھارٹی کے قیام اور ادائیگی نظام میں اصلاحات کا عمل بھی جاری ہے۔

اعلامیے کے مطابق ویزا حکام نے پاکستان کی معیشت پر اعتماد کا اظہار کیا جبکہ وزیر خزانہ نے ڈیجیٹل پیمنٹس میں توسیع کے لیے بینکوں اور فن ٹیک اداروں کے درمیان شراکت داری پر زور دیا۔ ملاقات میں ٹئیر ٹو اور ٹئیر تھری شہروں میں ڈیجیٹل ادائیگیوں کے فروغ، چھوٹے کاروباروں کے لیے کیش لیس ادائیگی سہولیات بڑھانے، فراڈ سے بچاؤ اور جدید ٹیکنالوجی کے استعمال پر بھی بات چیت ہوئی۔

اس کے علاوہ ترسیلات زر اور ای کامرس میں ڈیجیٹل نظام کے مؤثر استعمال پر بھی غور کیا گیا۔