سونا عوام کی پہنچ سے مزید دور، قیمت میں آج بھی ہزاروں روپے کا اضافہ

بین الاقوامی بلین مارکیٹ اور مقامی صرافہ مارکیٹوں میں ہفتے کے روز مسلسل دوسرے دن بھی سونے اور چاندی کی قیمتوں میں اضافے کا رجحان برقرار رہا۔

بین الاقوامی بلین مارکیٹ میں فی اونس سونے کی قیمت مزید 37 ڈالر اضافے کے ساتھ 4 ہزار 509 ڈالر کی سطح پر پہنچ گئی۔

عالمی مارکیٹ میں اضافے کے اثرات مقامی صرافہ بازاروں میں بھی دیکھنے میں آئے، جہاں 24 قیراط فی تولہ سونے کی قیمت 3 ہزار 700 روپے اضافے کے بعد 4 لاکھ 72 ہزار 262 روپے ہو گئی۔
اسی طرح فی دس گرام سونے کی قیمت 3 ہزار 172 روپے اضافے سے 4 لاکھ 05 ہزار 745 روپے کی سطح پر پہنچ گئی۔

چاندی کی قیمتوں میں بھی اضافہ ریکارڈ کیا گیا، جہاں فی تولہ چاندی 270 روپے مہنگی ہو کر 8 ہزار 465 روپے جبکہ فی دس گرام چاندی 232 روپے اضافے کے ساتھ 7 ہزار 257 روپے کی سطح پر آگئی۔

ماہرین کے مطابق عالمی معاشی غیر یقینی صورتحال اور سرمایہ کاروں کا محفوظ سرمایہ کاری کی جانب رجحان سونے کی قیمتوں میں اضافے کی بڑی وجہ ہے۔