وزن کم کرنیوالی ادویات وزن گھٹانے کے علاوہ کیا فائدے رکھتی ہیں؟

نیویارک/لندن: ایک جدید طبی تحقیق میں انکشاف ہوا ہے کہ وزن کم کرنے والی مشہور زمانہ GLP-1 کلاس کی ادویات (جیسے اوزیمپک اور ویگووی) نہ صرف موٹاپے سے نجات دلاتی ہیں بلکہ ایک فعال اور توانائی سے بھرپور زندگی گزارنے میں بھی کلیدی کردار ادا کر رہی ہیں۔ 2020 کی دہائی کے آغاز سے امریکہ میں مقبول ہونے والے ان انجیکشنز کے بارے میں اب یہ بات سامنے آئی ہے کہ ہر آٹھ میں سے ایک امریکی ان کا استعمال کر رہا ہے۔

سائنس دانوں کے حالیہ مطالعے کے مطابق، ان ادویات کے فوائد صرف وزن کم کرنے تک محدود نہیں بلکہ یہ جسم کے دیگر اعضاء کے نظام کے لیے بھی انتہائی سودمند ہیں۔ تحقیق میں دیکھا گیا ہے کہ یہ ادویات اس نقصان دہ سوزش (Inflammation) کو کم کرنے میں مدد دیتی ہیں جو مہلک کینسر، ڈیمنشیا اور قلبی امراض (دل کی بیماریوں) کا سبب بنتی ہے۔

امریکن کڈنی فنڈ (American Kidney Fund) کی رپورٹ کے مطابق، GLP-1 ادویات گردوں کی بیماری کو بگڑنے سے روکنے اور گردے فیل ہونے کے خطرات کو نمایاں طور پر کم کرنے کی صلاحیت رکھتی ہیں۔ علاوہ ازیں، کنگز کالج لندن کی ایک حالیہ تحقیق میں بتایا گیا ہے کہ سیماگلوٹائڈ (Semaglutide)، جو اوزیمپک اور ویگووی کا بنیادی جز ہے، جگر کی بیماری میں مبتلا دو تہائی مریضوں کے لیے مؤثر ثابت ہوا ہے۔ طبی ماہرین ان ادویات کو جدید طب میں ایک بڑے انقلاب کے طور پر دیکھ رہے ہیں جو مستقبل میں متعدد دائمی بیماریوں کے علاج کا رخ بدل سکتی ہیں۔