گلوبل پولیو ایریڈیکیشن انیشیٹو کے پولیو اوور سائٹ بورڈ کا پاکستان کا دورہ

گلوبل پولیو ایریڈیکیشن انیشیٹو کے پولیو اوور سائٹ بورڈ کے ایک اعلیٰ سطحی وفد نے پاکستان کا اہم دورہ کیا ہے، جہاں انہوں نے نیشنل ایمرجنسی آپریشنز سینٹر (NEOC) میں انسدادِ پولیو پروگرام کے اعلیٰ حکام سے ملاقات کی۔ اس موقع پر وفد کو ملک میں پولیو کے خاتمے کی کوششوں، چیلنجز اور حالیہ پیش رفت پر تفصیلی بریفنگ دی گئی۔ نیشنل ای او سی کے مطابق، وفد نے پاکستان کے انسدادِ پولیو پروگرام پر مکمل اعتماد کا اظہار کرتے ہوئے مسلسل عالمی تعاون کے عزم کا اعادہ کیا اور حکومتِ پاکستان کی مؤثر قیادت اور ٹھوس عزم کو سراہا۔ اجلاس میں اتفاق کیا گیا کہ آئندہ چھ ماہ پاکستان اور دنیا بھر سے پولیو کے مکمل خاتمے کے لیے انتہائی فیصلہ کن ہیں، جس کے لیے معمول کے حفاظتی ٹیکہ جات (Routine Immunization) کے نظام کو مزید مضبوط بنانا ہوگا۔ دورے کے دوران وفد نے فرنٹ لائن پر خدمات انجام دینے والی خواتین ہیلتھ ورکرز سے خصوصی ملاقات کی، ان کے تجربات سنے اور پولیو فری دنیا کے خواب کو شرمندۂ تعبیر کرنے میں ان کے کلیدی اور گراں قدر کردار کو زبردست خراجِ تحسین پیش کیا۔