جناح ہسپتال میں مفت گردہ پیوند کاری سہولت کا عملی آغاز

وزیراعلیٰ پنجاب کے صحت کے شعبے میں انقلابی وژن کی جانب ایک اور اہم پیش رفت سامنے آ گئی ہے، جہاں جناح ہسپتال لاہور میں مفت گردہ پیوند کاری کی سہولت کا باقاعدہ آغاز کر دیا گیا ہے۔

جناح ہسپتال لاہور میں یورولوجی ڈیپارٹمنٹ کی ٹیم نے پنجاب ہیلتھ کیئر کمیشن سے لائسنس حاصل کرنے کے بعد پہلا کامیاب کڈنی ٹرانسپلانٹ مکمل کر لیا۔ 23 سالہ مریض عرفان کو ان کی خالہ نے گردہ عطیہ کیا، کامیاب آپریشن کے بعد مریض اور گردہ عطیہ کرنے والی خاتون دونوں کی حالت تسلی بخش بتائی جا رہی ہے جبکہ صحت یابی کا عمل تیزی سے جاری ہے۔

اس کامیاب آپریشن پر پرنسپل علامہ اقبال میڈیکل کالج ڈاکٹر طیبہ وسیم نے یورولوجی ڈیپارٹمنٹ کی پوری ٹیم کو مبارکباد دیتے ہوئے اسے سرکاری سطح پر مفت گردہ پیوند کاری کی سہولت کے آغاز کی جانب ایک سنگِ میل قرار دیا۔

انتظامیہ کے مطابق جناح ہسپتال میں مفت کڈنی ٹرانسپلانٹ کی سہولت سے مستحق مریضوں کو مہنگے نجی علاج سے نجات ملے گی اور عوامی سطح پر معیاری طبی سہولیات کی فراہمی ممکن ہو سکے گی۔