امریکا: گوشت کھانے والے خطرناک بیکٹیریا سے ایک اور ہلاکت

امریکی ریاست فلوریڈا میں جان لیوا بیکٹیریا ‘وائبرو وُلنیفیکس’ (Vibrio vulnificus) کے باعث ایک اور شخص کی ہلاکت کی تصدیق کی گئی ہے، جس کے بعد رواں سال ریاست میں اس خطرناک انفیکشن سے ہونے والی اموات کی مجموعی تعداد دو ہو گئی ہے جبکہ اب تک 14 افراد متاثر ہو چکے ہیں۔ یہ بیکٹیریا عموماً گرم سمندری یا کھارے پانی میں پایا جاتا ہے اور جسم پر موجود کھلے زخم کے آلودہ پانی سے لگنے یا کچی و نیم پکی سمندری خوراک (خصوصاً اوئسٹر) کھانے سے انسانوں میں منتقل ہوتا ہے۔

فلوریڈا محکمہ صحت اور طبی ماہرین کے مطابق یہ انفیکشن انتہائی تیزی سے پھیلتا ہے، جس سے جلد پر چھالے، ٹشوز کی تباہی، خون میں شدید انفیکشن اور سیپٹک شاک جیسی سنگین صورتحال پیدا ہو سکتی ہے، جبکہ بعض کیسز میں متاثرہ عضو کو کاٹنا پڑتا ہے یا مریض ایک سے دو دن میں دم توڑ جاتا ہے۔ ماہرین نے شہریوں کو خبردار کیا ہے کہ گرم موسم میں اس بیکٹیریا کے کیسز بڑھ جاتے ہیں، لہٰذا کھلے زخم کے ساتھ سمندری پانی میں جانے سے گریز کریں اور کسی بھی لالی، سوجن یا بخار کی صورت میں فوری طبی امداد حاصل کریں۔