سانحہ پمز کے بعد وفاقی ہسپتالوں میں ڈیجیٹل مانیٹرنگ متعارف کرانے کی تیاری

اسلام آباد: پمز (PIMS) ہسپتال کے ناخوشگوار واقعہ کے بعد وفاقی وزارتِ صحت نے تمام سرکاری ہسپتالوں کے انتظامی اور آپریشنل نظام کو جدید ڈیجیٹل ٹیکنالوجی پر منتقل کرنے کا باضابطہ فیصلہ کر لیا ہے۔

وزارتِ صحت کے حکام کے مطابق اس اقدام کا بنیادی مقصد سرکاری ہسپتالوں کے انتظامی امور میں موجود خامیوں کی نشاندہی، شفافیت اور کارکردگی کو بہتر بنانا ہے۔ وفاقی وزیرِ صحت مصطفیٰ کمال نے پاکستان ڈیجیٹل اتھارٹی (PDA) کے چیئرمین ڈاکٹر سہیل منیر سے اہم ملاقات کی، جس میں ہسپتالوں کے آپریشنز کی مکمل ڈیجیٹلائزیشن اور مانیٹرنگ سے متعلق اہم فیصلے کیے گئے۔

منصوبے کے تحت ہسپتالوں کا کمپلینٹ مینجمنٹ سسٹم مصنوعی ذہانت (Artificial Intelligence) پر مبنی بنانے پر غور کیا جا رہا ہے۔ اس جدید نظام کے ذریعے اے آئی (AI) ایجنٹس شہریوں کی شکایات موصول کریں گے اور ان کا خودکار انداز میں اندراج اور ازالہ ممکن بنائیں گے۔ حکام نے عزم ظاہر کیا ہے کہ عوامی صحت کے شعبے میں جوابدہی کو یقینی بنانے کے لیے ہر ممکن سخت اور مؤثر اقدامات کیے جائیں گے۔