انسدادِ پولیو مہم 11 سے 24 مئی تک جاری رہے گی: مصطفیٰ کمال

کراچی: وفاقی وزیرِ صحت مصطفیٰ کمال نے ملک سے پولیو کے مکمل خاتمے کے لیے ایک نئی مہم کا اعلان کرتے ہوئے بتایا ہے کہ خصوصی انسدادِ پولیو مہم 11 مئی سے 24 مئی تک جاری رہے گی۔ یہ اعلان انہوں نے ایمرجنسی آپریشنز سینٹر (EOC) سندھ کے کوآرڈینیٹر سے ملاقات کے دوران کیا، جہاں انہیں صوبے اور بالخصوص کراچی میں پولیو کی صورتحال پر تفصیلی بریفنگ دی گئی۔ کراچی کی منتخب ہائی رسک یونین کونسلز میں یہ مہم 10 سال تک کے بچوں کے لیے ہوگی تاکہ وائرس کے پھیلاؤ کو مؤثر طریقے سے روکا جا سکے۔ جن علاقوں میں پولیو وائرس کے ماحولیاتی نمونے مثبت آئے ہیں، وہاں “ریڈ زون” حکمتِ عملی اپنائی جا رہی ہے، جس کے تحت ویکسینیشن کوریج کو سو فیصد یقینی بنایا جائے گا۔وفاقی وزیر نے بتایا کہ سہراب گوٹھ جیسے حساس علاقوں میں نئی ڈسپنسری کے قیام پر کام جاری ہے، جہاں جلد طبی خدمات کا آغاز کر دیا جائے گا۔

مہم کو کامیاب بنانے کے لیے مقامی علماء کرام، کمیونٹی لیڈرز اور سماجی شخصیات کو بھی شامل کیا جا رہا ہے تاکہ والدین کے اعتماد میں اضافہ کیا جا سکے۔مصطفیٰ کمال نے حکام کو ہدایت کی کہ مائیکرو پلاننگ کو مزید بہتر بنایا جائے اور کسی بھی وجہ سے ویکسین سے محروم رہ جانے والے (Refusal or Missed) بچوں کی نشاندہی کر کے انہیں ہر صورت قطرے پلائے جائیں۔ انہوں نے مزید کہا کہ کچی آبادیوں اور دور دراز دیہی علاقوں پر خصوصی توجہ دی جا رہی ہے اور شہری سطح پر نئے ویکسینیشن سینٹرز قائم کیے جا رہے ہیں تاکہ رسائی کو آسان بنایا جا سکے۔