فوجی فاؤنڈیشن اسپتال کے میڈیکل سٹور سے ادویات چوری کا ڈراپ سین

راولپنڈی: تھانہ مورگاہ کی حدود میں واقع فوجی فاؤنڈیشن اسپتال کے میڈیکل اسٹور سے قیمتی ادویات اور انجکشن چوری ہونے کے واقعے کا ڈراپ سین ہو گیا ہے۔ پولیس تحقیقات کے مطابق اس واردات میں اسپتال کا اپنا عملہ ہی ملوث نکلا، جس کے بعد پولیس نے کارروائی کرتے ہوئے مجموعی طور پر 6 ملزمان کو گرفتار کر لیا ہے۔

گرفتار ملزمان میں اسپتال عملے کے 5 ارکان شامل ہیں جنہوں نے اپنے ایک بیرونی ساتھی کے ساتھ مل کر اسٹور سے قیمتی ادویات اور انجکشن چوری کیے تھے۔ پولیس نے ملزمان کے قبضے سے چوری شدہ ادویات کی فروخت سے حاصل ہونے والی 1 لاکھ 70 ہزار روپے کی نقدی اور واردات میں استعمال ہونے والا موٹر سائیکل بھی برآمد کر لیا ہے۔

واضح رہے کہ اس واقعے کا مقدمہ اسٹور انچارج زکریا شعیب کی مدعیت میں درج کیا گیا تھا۔ پولیس کا کہنا ہے کہ ملزمان نے ابتدائی تفتیش میں اپنے جرم کا اعتراف کر لیا ہے اور ان کے خلاف قانونی کارروائی کا آغاز کر دیا گیا ہے۔ اسپتال انتظامیہ نے بھی اس واقعے کے بعد سکیورٹی اور مانیٹرنگ کے نظام کو مزید سخت کرنے کا فیصلہ کیا ہے۔