خواتین میں 45 سال کے بعد جگر میں چربی بڑھنے کی وجہ سامنے آگئی

ماہرین امراضِ نسواں کے مطابق خواتین میں پینتالیس سال کی عمر کے بعد جگر میں چربی تیزی سے بڑھنے لگتی ہے، جس کی بنیادی وجہ ہارمون ایسٹروجن کی کمی قرار دی گئی ہے۔

ماہرین کا کہنا ہے کہ تولیدی عمر کے اختتام کے بعد جسم میں ایسٹروجن کی سطح کم ہو جاتی ہے، جس کے باعث چربی کی تقسیم میں نمایاں تبدیلی آتی ہے۔ اس دوران کولہوں اور رانوں میں جمع ہونے والی چربی پیٹ اور اندرونی اعضا کے گرد جمع ہونا شروع ہو جاتی ہے۔

ان کے مطابق اس تبدیلی کے نتیجے میں انسولین کے اثرات کم ہو جاتے ہیں، جس سے جگر میں چربی جمع ہونے کا عمل تیز ہو جاتا ہے۔

ماہرین نے خبردار کیا کہ ابتدائی مراحل میں یہ بیماری خاموش رہتی ہے اور وزن میں واضح اضافہ بھی نہیں ہوتا، جس کے باعث اکثر خواتین بروقت تشخیص نہیں کر پاتیں۔

انہوں نے کہا کہ اس کیفیت کے نتیجے میں ذیابیطس، دل کے امراض اور فالج کا خطرہ بڑھ سکتا ہے، لہٰذا خواتین کو اپنی صحت پر خصوصی توجہ دینی چاہیے۔