جگر کے عام ترین مرض کے پھیلاؤ ایک بڑی ممکنہ وجہ دریافت

جگر پر چربی چڑھنے کا مرض (Fatty Liver Disease) ایک دائمی اور سنگین عارضہ ہے جس کا سامنا دنیا بھر میں کروڑوں افراد کو ہے۔ طبی زبان میں اسے ‘نان الکحلک فیٹی لیور ڈیزیز’ (NAFLD) بھی کہا جاتا ہے، جو جگر کے امراض کی سب سے عام ترین قسم ہے۔ اس بیماری میں جگر غیر معمولی مقدار میں چربی ذخیرہ کرنے لگتا ہے، اور اگر بروقت علاج نہ کیا جائے تو جگر مکمل طور پر ناکارہ ہو سکتا ہے، جس کے نتیجے میں ذیابیطس ٹائپ 2 اور موٹاپے جیسے دیگر میٹابولک امراض کا خطرہ بھی بڑھ جاتا ہے۔

تاہم اب امریکی سائنسدانوں نے اس بیماری کے دنیا بھر میں تیزی سے پھیلنے کی ایک انتہائی چونکا دینے والی اور نئی وجہ دریافت کی ہے۔ ریاستہائے متحدہ امریکا کی ‘ٹیکساس اے اینڈ ایم یونیورسٹی’ کے محققین کی جانب سے کی جانے والی ایک طبی تحقیق میں انکشاف کیا گیا ہے کہ پلاسٹک کی سب سے عام قسم ‘پولی تھین’ (Polythene) سے خارج ہونے والے مائیکرو و نینو ذرات جگر پر چربی چڑھنے کے عارضے میں بنیادی کردار ادا کر رہے ہیں۔

معتبر سائنسی جریدے ‘سائنس ایڈوانسز’ (Science Advances) میں شائع ہونے والی اس تحقیق کے مطابق، پولی تھین کے یہ ننھے ذرات انسانی جگر میں داخل ہو کر چربی کے ذخیرہ ہونے کے عمل کو تیز کر دیتے ہیں۔ محققین کا کہنا ہے کہ اگر کوئی فرد چکنائی، میٹھے، کولیسٹرول اور فاسٹ فوڈ سے بھرپور ناقص غذاؤں کا استعمال کرتا ہے، تو ان پلاسٹک ذرات کی موجودگی جگر کو پہنچنے والے نقصان کو دوگنا کر دیتی ہے۔

ماہرین کا کہنا ہے کہ روایتی طور پر پولی تھین کو انسانی جسم کے لیے زیادہ نقصان دہ نہیں سمجھا جاتا تھا، لیکن یہ نتائج ظاہر کرتے ہیں کہ ماحولیاتی آلودگی اور ناقص غذائی عادات مل کر جگر کے افعال کو متوقع سے کہیں زیادہ تیزی سے تباہ کر رہی ہیں۔ عالمی تخمینے کے مطابق دنیا کی 25 فیصد آبادی اس مرض سے متاثر ہے، اور اس نئی دریافت کے بعد ماہرین نے پلاسٹک کے استعمال کو کم کرنے اور غذائی پرہیز پر زور دیا ہے۔