جسم میں موجود چربی سے متعلق نئی تحقیق میں اہم انکشاف!

ایک نئی سائنسی تحقیق نے واضح کیا ہے کہ جسم میں موجود چربی (فیٹ ٹشو) محض اضافی وزن کا سبب نہیں بلکہ توانائی ذخیرہ کرنے، ہارمونز کی تیاری اور میٹابولزم کو متوازن رکھنے والا ایک اہم عضو ہے۔ ماہرین نے خبردار کیا ہے کہ چربی کی زاید مقدار کی طرح اس کی غیر معمولی کمی بھی شدید خطرناک ہے، جیسا کہ نایاب جینیاتی بیماری ‘فیملیل پارشل لیپوڈسٹریفی ٹائپ 2‘ (FPLD2) میں دیکھا جاتا ہے۔ امریکی اینڈوکرائنولوجسٹ ڈاکٹر ایلف اورال اور ان کی ٹیم نے چوہوں میں ‘لامن اے/سی’ (Lamin A/C) جین کو غیر فعال کر کے یہ معلوم کیا کہ فیٹ خلیات کی اندرونی خرابی میٹابولزم کو شدید متاثر کر کے ذیابیطس کا باعث بنتی ہے۔ سائنس دانوں کے مطابق اس اہم پیشرفت سے نہ صرف نایاب بیماریوں کو سمجھنے میں مدد ملے گی بلکہ مستقبل میں ذیابیطس کے مؤثر علاج کی نئی راہیں بھی کھلیں گی۔