دانتوں کو بغیر نقصان پہنچائے سفید کرنیوالا پاؤڈر تیار

چینی سائنسدانوں نے ایک نیا پاؤڈر تیار کیا ہے جو برقی ٹوتھ برش کی جھنجھناہٹ سے فعال ہو کر دانت سفید کرنے میں مدد دیتا ہے۔ محققین کا کہنا ہے کہ اس نئی ایجاد کی مدد سے وہ گھر پر محفوظ اور مؤثر طریقے سے دانت سفید کرنے کے نئے طریقے وضع کر سکیں گے، جو دانتوں کی صحت کا بھی خیال رکھیں گے۔

ماہرین کے مطابق دانتوں پر داغ کی عمومی وجوہات میں جینیاتی عوامل شامل ہیں، جبکہ کافی، ٹماٹر اور دیگر غذاؤں کے استعمال کے ساتھ باقاعدہ برش کرنے کے باوجود بھی دانتوں پر داغ پیدا ہو سکتے ہیں۔

اس سے قبل دانت سفید کرنے کے لیے کیمیکل سے بنے وائٹنرز جیسے پیروکسائیڈ والے بلیچنگ جیل اور ماؤتھ واش استعمال کیے جاتے تھے، لیکن یہ ری ایکٹیو آکسیجن اسپیشیز (ROS) پیدا کرتے ہیں جو نہ صرف داغ کے مالیکیولز کو ہٹاتے ہیں بلکہ دانت کے انامل کو بھی نقصان پہنچاتے ہیں۔

چینی سائنسدانوں کے تیار کردہ اس نئے پاؤڈر کی خاص بات یہ ہے کہ یہ برقی ٹوتھ برش کی جھنجھناہٹ سے فعال ہو کر داغ کو ہٹانے کے ساتھ دانت کی حفاظت بھی کرتا ہے، اور دانتوں کے سفید ہونے کا عمل زیادہ محفوظ اور قدرتی طریقے سے انجام پاتا ہے۔