روزانہ انڈے کھانے سے دماغ پر کیا اثرات مرتب ہوتے ہیں؟

انڈے صحت کے لیے اہم متعدد ضروری غذائی اجزا سے بھرپور ہوتے ہیں جن میں پروٹین اور صحت بخش چکنائی شامل ہے، اسی وجہ سے انہیں ناشتے کے لیے بہترین غذا قرار دیا جاتا ہے۔ اب ایک نئی تحقیق میں انکشاف کیا گیا ہے کہ انڈوں میں موجود ایک جز کولین دماغی عمر کی رفتار کو سست کرنے اور مجموعی صحت کو بہتر بنانے میں اہم کردار ادا کرتا ہے۔

جرنل Aging and Disease میں شائع ہونے والی تحقیق کے مطابق موٹاپے کے شکار افراد کے خون میں کولین کی سطح صحت مند وزن رکھنے والے افراد کے مقابلے میں نمایاں طور پر کم پائی گئی۔

محققین کا کہنا ہے کہ جسم میں کولین کی کمی انسولین مزاحمت میں اضافے، ورم (Inflammation) اور جگر کے افعال میں خرابی کا باعث بن سکتی ہے، اور یہ تمام عوامل الزائمر جیسی دماغی بیماریوں کے خطرے کو بڑھاتے ہیں۔

تحقیق میں بتایا گیا کہ موٹاپے کے شکار افراد میں یہ منفی اثرات زیادہ شدت سے دیکھے گئے، جبکہ یہ بھی سامنے آیا کہ الزائمر کی علامات ظاہر ہونے سے کئی برس پہلے ہی جسم میں کولین کی سطح کم ہونا شروع ہو جاتی ہے۔

محققین کے مطابق نتائج سے عندیہ ملتا ہے کہ اگر کولین سے بھرپور غذاؤں، خصوصاً انڈوں، کو روزمرہ خوراک کا حصہ بنایا جائے تو میٹابولک مسائل اور دماغی تنزلی کے خطرات میں کمی ممکن ہے۔

اس تحقیق میں موٹاپے کے شکار نوجوان افراد کو شامل کیا گیا اور ان کے ڈیٹا کا موازنہ دماغی تنزلی میں مبتلا معمر افراد کے ڈیٹا سے کیا گیا۔ شواہد سے یہ بات سامنے آئی کہ جوانی میں میٹابولک تناؤ بعد کی زندگی میں دماغی صحت پر منفی اثرات مرتب کر سکتا ہے۔

تاہم محققین نے واضح کیا کہ یہ نتائج ابھی حتمی نہیں ہیں اور اس حوالے سے مزید تحقیق کی ضرورت ہے۔

ماہرین کے مطابق انڈوں کے علاوہ کلیجی، گوبھی، بیج، مونگ پھلی، گوشت، مرغی، مچھلی، دودھ اور دودھ سے بنی مصنوعات بھی کولین کے اچھے ذرائع ہیں۔