الزائمر کی جلد تشخیص ممکن، دماغ میں نئی علامت دریافت

سنگاپور: سنگاپور کی نانیانگ ٹیکنالوجیکل یونیورسٹی کے سائنسدانوں نے الزائمر کی جلد تشخیص کے حوالے سے اہم پیش رفت کر لی ہے۔ تحقیق میں بتایا گیا ہے کہ دماغ میں پھیلی ہوئی پیری واسکولر اسپیسز الزائمر کی ابتدائی علامات سے مضبوط تعلق رکھتی ہیں۔

ماہرین کے مطابق جب خون کی شریانوں کے گرد نکاسی کا نظام متاثر ہوتا ہے تو اعصابی فضلہ جمع ہونے لگتا ہے، جو بعد ازاں دماغی افعال کو متاثر کرتا ہے۔ یہی تبدیلی ایم آر آئی اسکینز کے ذریعے باآسانی دیکھی جا سکتی ہے۔

تحقیق کے شریک مصنف جسٹن اونگ کا کہنا ہے کہ الزائمر کی بروقت تشخیص سے یادداشت کی کمزوری، سوچنے کی رفتار میں کمی اور مزاج میں تبدیلی جیسے مسائل کی رفتار کو کم کیا جا سکتا ہے۔

ماہرین نے بتایا کہ یہ تحقیق ایشیائی آبادی پر مبنی ہے، جو الزائمر سے متعلق عالمی تحقیق میں موجود ایک اہم خلا کو پُر کرتی ہے اور مستقبل میں سادہ ایم آر آئی اسکینز کو الزائمر کی ابتدائی تشخیص کا مؤثر ذریعہ بنا سکتی ہے۔