ڈریپ کا آن لائن ادویات کی غیر قانونی فروخت اور تشہیر پر سخت ایکشن، ویب سائٹس بلاک کرنے کی درخواست

ڈریپ کی جانب سے جاری مراسلے میں ادویات فروخت کرنے والے متعدد آن لائن پلیٹ فارمز کی نشاندہی کی گئی ہے جبکہ بھارت اور ایران سے اسمگل شدہ ادویات کی آن لائن فروخت کا بھی انکشاف سامنے آیا ہے۔

اتھارٹی نے خبردار کیا ہے کہ غیر رجسٹرڈ اور اسمگل شدہ ادویات کی فروخت عوامی صحت کے لیے سنگین خطرہ ہے۔ خط میں سوشل میڈیا اور ویب سائٹس پر نسخے کے بغیر ادویات کی تشہیر پر بھی تشویش کا اظہار کیا گیا ہے۔

ڈریپ کے مطابق جنسی صحت، وزن میں کمی اور ذہنی امراض سے متعلق ادویات کی آن لائن فروخت غیر قانونی ہے جبکہ سوشل میڈیا اشتہارات لوگوں کو خود علاج کی طرف مائل کر رہے ہیں جو مزید خطرات کو جنم دے سکتا ہے۔

اتھارٹی نے واضح کیا ہے کہ بغیر اجازت ادویات کی تشہیر اور فروخت ڈرگ قوانین کی خلاف ورزی ہے اور غیر معیاری ادویات سنگین مضر اثرات حتیٰ کہ جان لیوا پیچیدگیوں کا سبب بن سکتی ہیں۔

ڈریپ حکام کے مطابق ادویات کے اشتہارات کے لیے پیشگی منظوری لازمی قرار دی گئی ہے جبکہ خلاف ورزی کی صورت میں جرمانے، ادویات کی ضبطی اور قانونی کارروائی کی جائے گی۔

ملک میں منکی پاکس کے کیسز میں تشویشناک اضافہ، 9 اموات کی تصدیق

ڈریپ نے پی ٹی اے سے مطالبہ کیا ہے کہ سوشل میڈیا کمپنیوں کے ساتھ مل کر غیر قانونی ادویات کے اشتہارات ہٹائے جائیں جبکہ عوام کو ہدایت کی گئی ہے کہ غیر مصدقہ آن لائن ذرائع سے ادویات خریدنے سے گریز کریں۔