کیا دانت نکلوانے سے نظر کمزور ہو جاتی ہے؟ تحقیق سامنے آ گئی

دانت نکلوانے اور نظر کمزور ہونے کے درمیان تعلق سے متعلق معاشرے میں ایک عام تاثر پایا جاتا ہے، تاہم حالیہ طبی تحقیق نے اس حوالے سے موجود غلط فہمیوں کو مسترد کر دیا ہے۔ ماہرین کے مطابق دانت نکلوانے سے نظر کمزور ہونے کا کوئی براہِ راست سائنسی ثبوت موجود نہیں۔

طبی ماہرین کا کہنا ہے کہ دانت اور آنکھیں انسانی جسم کے دو الگ نظاموں سے تعلق رکھتی ہیں۔ دانتوں کا تعلق جبڑے، مسوڑھوں اور اعصاب سے ہوتا ہے، جبکہ بینائی کا نظام آنکھوں اور دماغ کے مخصوص حصوں پر مشتمل ہوتا ہے، اس لیے دونوں کے درمیان براہِ راست تعلق ثابت نہیں ہوتا۔

تحقیق کے مطابق دانت نکلوانے سے بینائی متاثر نہیں ہوتی۔ البتہ بعض افراد کو دانت نکلوانے کے بعد وقتی طور پر سر درد، آنکھوں میں دباؤ یا کمزوری محسوس ہو سکتی ہے، جس کی وجوہات اینستھیزیا، ذہنی دباؤ یا اعصابی حساسیت ہو سکتی ہیں۔ ماہرین واضح کرتے ہیں کہ یہ علامات عارضی ہوتی ہیں اور انہیں نظر کی مستقل کمزوری سے جوڑنا درست نہیں۔

تحقیق میں یہ بھی بتایا گیا ہے کہ اگر دانتوں کے انفیکشن کا بروقت علاج نہ کیا جائے تو وہ جسم کے دیگر حصوں پر منفی اثرات ڈال سکتے ہیں، تاہم اس کا یہ مطلب ہرگز نہیں کہ دانت نکلوانے سے براہِ راست بینائی متاثر ہوتی ہے۔ ماہرین کے مطابق شدید انفیکشن کی صورت میں دانت نکلوانا مجموعی صحت کے لیے فائدہ مند ثابت ہوتا ہے۔