حفاظتی ٹیکہ جات پروگرام سندھ کی جانب سے ویکسینیٹرز کو جدید سیل فون فراہم

کراچی کے ضلع وسطی میں ای پی آئی سندھ کے تحت ویکسینیٹرز میں ڈیجیٹل امیونائزیشن رجسٹری (SEIR) کے جدید موبائل فونز تقسیم کیے گئے ہیں۔

حکام کے مطابق اس اقدام کا مقصد حفاظتی ٹیکہ جات کے نظام کو مزید مؤثر، شفاف اور ڈیجیٹل بنیادوں پر مضبوط بنانا ہے تاکہ بچوں کی بروقت ویکسینیشن اور درست ڈیٹا اندراج کو یقینی بنایا جا سکے۔

یہ موبائل فونز پروجیکٹ ڈائریکٹر ای پی آئی سندھ راج کمار کی جانب سے فراہم کیے گئے، جبکہ کورونا وبا کے دوران بھرتی کیے گئے ویکسینیٹرز کو بھی اس سہولت میں شامل کیا گیا جو اب باقاعدہ طور پر پروگرام کا حصہ ہیں۔

اس موقع پر ڈسٹرکٹ ہیلتھ آفیسر سینٹرل ڈاکٹر فرقان نبیل خان نے ویکسینیٹرز کو ہدایت دی کہ وہ اپنی کارکردگی مزید بہتر بنائیں اور ہر بچے تک ویکسین کی رسائی کو یقینی بنائیں۔

تقریب میں ڈاکٹر عروہ، ڈاکٹر علیزہ، ڈاکٹر ثمرین اور کاظم رضوی سمیت دیگر متعلقہ حکام بھی شریک تھے، جنہوں نے اس اقدام کو صحت عامہ کے نظام میں بہتری کی جانب اہم قدم قرار دیا۔