اسلام آباد میں ڈینگی کیسز میں واضح کمی، انسداد مہم مزید تیز

وفاقی دارالحکومت اسلام آباد میں ڈینگی کے خلاف جاری کارروائی مزید تیز کر دی گئی ہے، اور انتظامیہ کے مطابق شہر صفر ڈینگی کیسز کے ہدف کے قریب پہنچ رہا ہے۔

حکام کے مطابق گزشتہ 24 گھنٹوں کے دوران شہر میں صرف تین نئے ڈینگی کیسز رپورٹ ہوئے، جبکہ انسپیکشن ٹیموں نے مجموعی طور پر 26 ہزار سے زائد مقامات کا معائنہ کیا۔ محکمہ صحت کی ٹیموں نے مختلف علاقوں میں 309 حساس پوائنٹس پر فوگنگ کی، اور انسپیکشن کے دوران 36 مقامات پر لاروا کی موجودگی کی تصدیق کے بعد فوری طور پر صفائی کی گئی۔ تمام ڈیٹا کو ایک جامع سسٹم میں جمع کر کے آئندہ حکمتِ عملی کے لیے استعمال کیا جا رہا ہے۔

سرکاری ہسپتالوں کی رپورٹ کے مطابق اس وقت اسلام آباد میں صرف نو ڈینگی مریض زیر علاج ہیں اور تمام کی حالت مستحکم ہے۔

ڈپٹی کمشنر اسلام آباد عرفان میمن نے کہا کہ مربوط کوششوں، مسلسل انسپیکشن اور بروقت فوگنگ کے نتیجے میں کیسز میں واضح کمی دیکھی گئی ہے۔ انہوں نے متعلقہ محکموں کو ہدایت کی کہ انسدادِ ڈینگی آپریشن کو سختی سے جاری رکھا جائے، اور شہریوں پر زور دیا کہ گھروں اور اردگرد پانی جمع نہ ہونے دیں۔

انتظامیہ نے واضح کیا ہے کہ ڈینگی کے مکمل خاتمے تک یہ مہم بغیر وقفے کے جاری رہے گی، جبکہ شہری تعاون کو کامیابی کی بنیادی شرط قرار دیا گیا ہے۔