قومی شاہراہوں پر 2026 میں ایئر ایمبولینس سروس شروع کرنے کا فیصلہ، وفاقی وزیر مواصلات

اسلام آباد: سینیٹ کی قائمہ کمیٹی برائے مواصلات کے اجلاس میں وفاقی وزیر مواصلات عبد العلیم خان نے کمیٹی کو بریفنگ دیتے ہوئے بتایا کہ وزارت مواصلات نے قومی شاہراہوں پر 2026 میں ایئر ایمبولینس سروس شروع کرنے کا فیصلہ کیا ہے۔

وفاقی وزیر نے بتایا کہ ایئر ایمبولینس سروس ہیلی کاپٹر کے ذریعے چلائی جائے گی اور اس مقصد کے لیے وزارت منصوبہ بندی یا وزارت خزانہ سے کوئی اضافی فنڈز طلب نہیں کیے جائیں گے۔ انہوں نے کہا کہ تمام قومی شاہراہوں پر ہر 20 سے 25 کلومیٹر کے فاصلے پر باقاعدہ سروس ایریاز قائم کیے جائیں گے تاکہ مسافروں کو بہتر سہولیات فراہم کی جا سکیں۔

عبد العلیم خان نے کمیٹی کو آگاہ کیا کہ سکھر حیدرآباد موٹروے کی تعمیر نو جاری ہے اور کراچی بندرگاہ کو موٹروے کے ساتھ منسلک کیا جا رہا ہے۔ ان کا کہنا تھا کہ سکھر حیدرآباد موٹروے وزیراعظم اور وزارت مواصلات کی سب سے بڑی ترجیح ہے۔

وفاقی وزیر مواصلات نے دعویٰ کیا کہ لاہور سے اسلام آباد کے سفر کا فاصلہ 100 کلومیٹر کم کیا جا رہا ہے۔ انہوں نے بتایا کہ سیالکوٹ تا کھاریاں اور کھاریاں تا راولپنڈی نئے منصوبے بنائے جا رہے ہیں، جنہیں 4 لین کے بجائے 6 لین موٹروے میں تبدیل کیا جائے گا۔

ان کا کہنا تھا کہ ان منصوبوں کی تکمیل کے بعد لاہور اور اسلام آباد کے درمیان سفر نہ صرف کم فاصلے بلکہ کم وقت میں بھی ممکن ہو سکے گا۔