پنجاب میں انٹر اویسکولر سرجری کی جدید تکنیک متعارف کروانے کا فیصلہ

وزیراعلیٰ پنجاب مریم نواز شریف نے صوبے میں امراضِ قلب کے علاج کے لیے انٹراویسکولر سرجری کی جدید ترین تکنیک متعارف کروانے کا فیصلہ کر لیا ہے، جسے دل کے علاج میں ایک اہم پیش رفت قرار دیا جا رہا ہے۔

اس سلسلے میں وزیراعلیٰ مریم نواز شریف سے اوکلاہوما ہارٹ ہسپتال کے چیئرمین بورڈ آف ڈائریکٹرز ڈاکٹر نعیم طاہر خیلی کی سربراہی میں وفد نے ملاقات کی۔ ملاقات کے دوران پنجاب میں جدید کارڈیالوجی سہولیات کے فروغ، جدید آلات کی فراہمی اور ڈاکٹروں کی تربیت پر تفصیلی تبادلہ خیال کیا گیا۔

وزیراعلیٰ نے انٹراویسکولر سرجری کے لیے جدید طبی آلات کی خریداری کے فوری اقدامات کی ہدایت کرتے ہوئے کہا کہ امریکی ماہر ڈاکٹرز اس جدید تکنیک کے لیے پاکستانی ڈاکٹروں کو تربیت فراہم کریں گے تاکہ عالمی معیار کے مطابق علاج ممکن بنایا جا سکے۔

بریفنگ میں بتایا گیا کہ انٹراویسکولر سرجری روایتی اوپن ہارٹ سرجری کا جدید، محفوظ اور کم خطرناک متبادل ہے، جس میں خون کی نالی میں ایک چھوٹے سے سوراخ کے ذریعے انجیوپلاسٹی، اسٹنٹ اور ابلیشن جیسے علاج کیے جاتے ہیں، جس سے مریض جلد صحت یاب ہو جاتا ہے۔

وزیراعلیٰ مریم نواز شریف نے جناح انسٹی ٹیوٹ آف کارڈیالوجی اور نواز شریف میڈیکل سٹی میں امراضِ قلب کے اس جدید طریقۂ علاج کو متعارف کروانے کے لیے عملی اقدامات کا حکم دیا۔ اس کے علاوہ چلڈرن ہسپتال، نشتر ہسپتال اور جناح ہسپتال کے ڈاکٹروں کو بھی خصوصی تربیت دینے کی تجویز سے اتفاق کیا گیا۔

وزیراعلیٰ کا کہنا تھا کہ پنجاب کے عوام کو عالمی معیار کی صحت سہولیات کی فراہمی حکومت کی اولین ترجیح ہے اور جدید طبی ٹیکنالوجی کے ذریعے دل کے مریضوں کے علاج میں انقلاب لایا جائے گا۔