ملکی برآمدگان،نافذ کردہ ایکسپورٹ ڈیویلپمنٹ سرچارج کو فوری طور پر ختم کرنے کا فیصلہ

وزیراعظم محمد شہباز شریف کی زیر صدارت ملکی برآمدات میں اضافے کے لیے قائم کردہ ذیلی ورکنگ گروپ کی سفارشات کا جائزہ اجلاس منعقد ہوا، جس میں برآمدات کے فروغ اور ایکسپورٹ پالیسی میں اصلاحات سے متعلق اہم فیصلے کیے گئے۔اجلاس میں فیصلہ کیا گیا کہ ملکی برآمدگان پر نافذ کردہ ایکسپورٹ ڈیویلپمنٹ سرچارج کو فوری طور پر ختم کیا جائے۔ وزیراعظم نے اس سلسلے میں متعلقہ اداروں کو ہنگامی بنیادوں پر اقدامات کی خصوصی ہدایت جاری کی۔
وزیراعظم نے ایکسپورٹ ڈیویلپمنٹ فنڈ (EDF) کا گزشتہ پانچ سال کا عالمی معیار کے مطابق تھرڈ پارٹی آڈٹ کرانے کی بھی ہدایت کی۔ انہوں نے واضح کیا کہ فنڈ میں موجود رقم کو صرف برآمدات بڑھانے، تحقیق و ترقی، برآمدی شعبے کی افرادی قوت کی ہنرمندی اور جدید سہولتوں کی فراہمی پر ہی خرچ کیا جائے۔ ساتھ ہی EDF کے تحت جاری تمام اسکیمز اور پروگرامز کا بھی علیحدہ تھرڈ پارٹی آڈٹ کرانے کے احکامات جاری کیے گئے۔
وزیراعظم نے ہدایت کی کہ ایکسپورٹ ڈیویلپمنٹ فنڈ کے مؤثر استعمال کے لیے پرائیویٹ سیکٹر سے ایک موزوں اور اہل چیئرمین کا انتخاب کیا جائے۔ انہوں نے کہا کہ EDF کا غیر متعلقہ اور غیر منطقی استعمال کسی صورت قابل قبول نہیں ہوگا۔
اجلاس میں وزیراعظم نے دنیا بھر میں پاکستانی مصنوعات کی بین الاقوامی سطح پر تشہیر اور پروموشن کو وفاقی حکومت کی بنیادی ذمہ داری قرار دیتے ہوئے اس شعبے میں مزید بہتری لانے کی ہدایات جاری کیں۔
وزیراعظم نے مزید کہا کہ ملکی برآمدات میں اضافے کے لیے صنعت کاروں کو ہر ممکن سہولت فراہم کرنا حکومت کی اولین ترجیحات میں شامل ہے۔ انہوں نے اس ضمن میں ٹریڈ ڈیویلپمنٹ اتھارٹی آف پاکستان (TDAP) کے کردار کا اصلاحاتی جائزہ لینے اور اس کی ازسرِ نو تشکیل کی بھی ہدایت کی۔
اجلاس میں ذیلی ورکنگ گروپ کی چیئرپرسن مصدق ذوالقرنین نے شعبے سے متعلق تحقیق کے بعد تیار کردہ تفصیلی سفارشات پیش کیں۔ وزیراعظم نے ورکنگ گروپ کی کارکردگی کو سراہا اور سفارشات پر مثبت غور کرتے ہوئے متعلقہ اداروں کو فوری اور مؤثر اقدامات کرنے کے احکامات جاری کیے۔اجلاس میں وفاقی وزیر برائے پلاننگ احسن اقبال، وزیر خزانہ محمد اورنگزیب، وفاقی وزیر برائے کامرس جام کمال، وفاقی وزیر برائے موسمیاتی تبدیلی ڈاکٹر مصدق ملک، وزیر پٹرولیم علی پرویز ملک، وزیر مملکت خزانہ اظہر بلال کیانی، چیئرمین SIFC اور دیگر اعلیٰ سرکاری حکام نے شرکت کی