کھانا بنانا بوڑھے افراد کو خطرناک دماغی بیماری سے بچا سکتا ہے: تحقیق

ٹوکیو: جاپان میں محققین کی جانب سے کی گئی ایک نئی تحقیق میں یہ بات سامنے آئی ہے کہ وہ معمر افراد جو گھر پر خود کھانا تیار کرتے ہیں، ان میں ڈیمنشیا (یادداشت کھو جانے کی بیماری) کے خطرات نمایاں طور پر کم ہو جاتے ہیں۔ تحقیق کے مطابق، بڑھاپے میں اکثر لوگ ذہنی مسائل یا سستی کی وجہ سے فروزن غذاؤں اور مائیکرو ویو میلز پر انحصار کرنے لگتے ہیں، جو ان کی ذہنی صحت کے لیے نقصان دہ ثابت ہو سکتا ہے۔

محققین کا کہنا ہے کہ کھانا پکانا محض ایک جسمانی کام نہیں بلکہ ایک پیچیدہ دماغی سرگرمی ہے جس میں منصوبہ بندی، یادداشت اور حواسِ خمسہ کا بیک وقت استعمال ہوتا ہے۔ مطالعے کے نتائج بتاتے ہیں کہ باقاعدگی سے کھانا پکانے والے بوڑھے افراد میں ڈیمنشیا کے خطرات 30 فیصد تک کم ہو جاتے ہیں۔

تحقیق کا سب سے دلچسپ پہلو یہ ہے کہ وہ افراد جو کھانا پکانے میں مہارت نہیں رکھتے یا ‘نو آموز’ ہیں، اگر وہ اس سرگرمی کو شروع کریں تو ان میں بیماری کے خطرات 70 فیصد تک کم ہو سکتے ہیں۔ اس کی وجہ یہ ہے کہ نئی چیزیں سیکھنے اور ترکیبوں (Recipes) پر توجہ دینے سے دماغ کے خلیات زیادہ متحرک رہتے ہیں، جو ذہنی تنزلی کو روکنے میں مددگار ثابت ہوتا ہے۔