سائنس دانوں کا کافی سے متعلق اہم انکشاف!

ٹیکساس اے اینڈ ایم یونیورسٹی کی ایک نئی سائنسی تحقیق سے معلوم ہوا ہے کہ کافی صرف سستی دور کرنے یا توانائی فراہم کرنے والا مشروب ہی نہیں بلکہ صحت مند بڑھاپے میں بھی اہم کردار ادا کر سکتی ہے۔ معروف طبی جریدے ’نیوٹرینٹس‘ میں شائع ہونے والی اس تحقیق کے مطابق کافی میں موجود بعض قدرتی مرکبات جسم کے اندر NR4A1 نامی ایک اہم ریسیپٹر کو متحرک کر دیتے ہیں۔ محققین کے مطابق یہ ریسیپٹر جسم میں سوزش، میٹابولزم، تناؤ کے ردِعمل اور ٹشوز کی خودکار مرمت جیسے حیاتیاتی افعال کو متوازن رکھتا ہے، جو کہ لمبی اور صحت مند عمر رسیدگی کے لیے انتہائی ضروری ہیں۔ ماہرینِ صحت کا کہنا ہے کہ یہ دریافت کافی کے استعمال سے دائمی بیماریوں کے کم ہونے کی ممکنہ سائنسی وجہ بیان کرتی ہے، تاہم انسانی جسم پر اس کے درست اثرات اور روزانہ کی درکار مقدار معلوم کرنے کے لیے مزید تحقیقات جاری ہیں۔