صحت مند پنجاب کے لیے ٹی بی کے خلاف جنگ جیتنا ناگزیر ہے، مریم نواز

لاہور: وزیراعلیٰ پنجاب مریم نواز نے عالمی یومِ تپِ دق کے موقع پر اپنے خصوصی پیغام میں کہا ہے کہ صوبے میں ٹی بی کے مرض کے مکمل خاتمے کے لیے حکومت نے پختہ عزم کر رکھا ہے۔ انہوں نے زور دیا کہ ایک صحت مند معاشرے کی تشکیل کے لیے اس موذی مرض کے خلاف جنگ جیتنا ناگزیر ہے، اور اس مقصد کے لیے بروقت تشخیص اور مؤثر علاج کو یقینی بنانا حکومت کی اولین ترجیح ہے۔

مریم نواز نے عوامی آگاہی کی اہمیت پر روشنی ڈالتے ہوئے کہا کہ ٹی بی اب ایک قابلِ علاج مرض ہے اور مناسب دیکھ بھال سے قیمتی جانیں بچائی جا سکتی ہیں۔ انہوں نے پنجاب حکومت کے انقلابی پروگرام کا ذکر کرتے ہوئے بتایا کہ ٹی بی، ہیپاٹائٹس اور امراضِ قلب کے مریضوں کے لیے گھر کی دہلیز پر مفت ادویات پہنچانے کا سلسلہ جاری ہے، تاکہ مریضوں کو ہسپتالوں کے چکر نہ کاٹنے پڑیں۔

وزیراعلیٰ نے مزید کہا کہ پنجاب بھر میں ٹی بی کے تمام مریضوں کو علاج کی بہترین سہولیات اور مفت ادویات کی فراہمی ہر صورت یقینی بنائی جائے گی۔ انہوں نے محکمہ صحت اور متعلقہ اداروں کو ہدایت کی کہ وہ اس جدوجہد میں اپنا بھرپور کردار ادا کریں تاکہ پنجاب کو جلد از جلد ٹی بی سے پاک کیا جا سکے۔