چین: ہارٹ فیلیئر کے مریضوں کے لیے نیا علاج امید کی کرن

چین کے نانجنگ ڈرم ٹاور اسپتال کے محققین کی جانب سے کی جانے والی ایک ابتدائی طبی تحقیق نے ہارٹ فیلیئر (دل کی ناکامی) کے مریضوں کے علاج میں ایک نئی امید پیدا کر دی ہے۔ کلینیکل ٹرائل کے دوران نئی اسٹیم سیل تھراپی کے ذریعے 10 میں سے 9 مریضوں کے دل کے افعال میں نمایاں بہتری دیکھی گئی۔ اس طریقہ علاج کے تحت مریضوں کے اپنے خلیوں کو تبدیل کر کے ’انڈیوسڈ پلوری پوٹنٹ اسٹیم سیلز‘ میں ڈھالا گیا اور پھر انہیں دل کے متاثرہ پٹھوں میں انجیکٹ کیا گیا تا کہ خراب ٹشوز کی بحالی اور نئے خلیوں کی نشوونما ممکن ہو سکے۔ اگرچہ نتائج انتہائی حوصلہ افزا ہیں اور اس سے دل کے پٹھوں کی کمزوری کا عمل سست ہونے کا اشارہ ملا ہے، تاہم ماہرین کا کہنا ہے کہ بڑے پیمانے پر مزید ٹرائلز کے بغیر اسے حتمی علاج قرار دینا قبل از وقت ہو گا۔