جنوبی پنجاب کے بچوں کے لیے بڑی خوشخبری: چلڈرن ہسپتال ملتان اور ‘جائیکا’ کے درمیان 6 ارب روپے کے منصوبے پر دستخط

ملتان میں بچوں کی صحت کی سہولیات کو جدید خطوط پر استوار کرنے کے لیے ایک اہم پیش رفت سامنے آئی ہے، جہاں چلڈرن ہسپتال ملتان اور جاپان انٹرنیشنل کوآپریشن ایجنسی (جائیکا) کے درمیان “جنوبی پنجاب میں بچوں کی صحت کی بہتری” کے منصوبے پر باضابطہ دستخط کر دیے گئے ہیں۔ ڈین پروفیسر ڈاکٹر کاشف چشتی کے زیرِ نگرانی منعقدہ اس تقریب میں کمشنر ملتان ڈویژن عامر کریم خان نے بطور مہمانِ خصوصی شرکت کی، جبکہ ڈپٹی کمشنر محمد نعمان صدیق، ایم ایس ڈاکٹر کامران اور جائیکا کی جاپانی کنسلٹنٹ ٹیم بھی موجود تھی۔ اس منصوبے کی کامیابی کا سہرا وزیراعلیٰ پنجاب مریم نواز کی خصوصی دلچسپی اور تعاون کے سر باندھا گیا ہے۔6 ارب روپے سے زائد مالیت کا یہ منصوبہ تقریباً تین سال میں مکمل ہوگا، جس کے تحت ہسپتال میں ایک جدید چار منزلہ ٹاور تعمیر کیا جائے گا۔ ڈین ڈاکٹر کاشف چشتی کے مطابق، اس ٹاور کو ایک پل کے ذریعے موجودہ عمارت سے جوڑا جائے گا، جس میں انتہائی نگہداشت یونٹ (ICU) کو اپ گریڈ کر کے 65 بستروں تک وسعت دی جائے گی۔ اس کے علاوہ ٹاور میں سی ٹی اسکین، الٹراساؤنڈ اور جدید ترین لیبارٹری سمیت تمام ڈائگناسٹک سہولیات میسر ہوں گی۔ یہ منصوبہ نہ صرف جنوبی پنجاب بلکہ سندھ، خیبر پختونخوا اور دیگر دور دراز علاقوں سے آنے والے بچوں کے لیے علاج کی ایک بڑی نعمت ثابت ہوگا۔ تقریب کے اختتام پر معاہدے کی خوشی میں کیک بھی کاٹا گیا اور تعمیراتی کام کے لیے باقاعدہ سروے اور ڈیزائننگ کے مراحل کا آغاز کر دیا گیا۔