پنیر دماغی صحت کے لیے جزوی طور پر مفید، مگر اعتدال ضروری

غذائی ماہرین کے مطابق پنیر کا محدود استعمال دماغی صحت کے لیے کچھ فوائد فراہم کر سکتا ہے، تاہم اس کا زیادہ استعمال نقصان دہ بھی ثابت ہو سکتا ہے۔

ماہرین کا کہنا ہے کہ پنیر میں موجود وٹامن بی 12 یادداشت کو بہتر بنانے میں مدد دیتا ہے جبکہ صحت مند چکنائیاں دماغی خلیات کی ساخت کو مضبوط بناتی ہیں۔ اسی طرح اس میں شامل پروٹین اور کیلشیم اعصابی نظام کی درست کارکردگی میں اہم کردار ادا کرتے ہیں۔

کچھ تحقیقی رپورٹس کے مطابق وہ افراد جو متوازن مقدار میں ڈیری مصنوعات استعمال کرتے ہیں، ان میں عمر بڑھنے کے ساتھ ذہنی کمزوری کا امکان نسبتاً کم دیکھا گیا ہے۔

تاہم ماہرین اس بات پر زور دیتے ہیں کہ پنیر میں نمک اور سیر شدہ چکنائی کی زیادہ مقدار دل کی بیماریوں کے خطرے کو بڑھا سکتی ہے، جو دماغی صحت کو بھی متاثر کر سکتی ہیں۔ اس لیے پنیر کا استعمال اعتدال میں رکھنا ہی صحت مند انتخاب ہے۔