جان بچانے والی 52 ادویات کی قیمتوں کی منظوری دیدی گئی

وفاقی وزیرِ خزانہ سینیٹر محمد اورنگزیب کی زیرِ صدارت کابینہ کی ذیلی کمیٹی نے کینسر، ذیابیطس، ہیموفیلیا اور پارکنسن کی 52 نئی رجسٹرڈ جان بچانے والی ادویات کی قیمتوں کی باضابطہ منظوری دے دی ہے۔ اسلام آباد میں منعقدہ اجلاس میں منظور شدہ ادویات میں کینسر کی جدید امیونو تھراپی دوا “کی ٹروڈا” (Keytruda)، نیوو لومیب، ڈاسا تینیب، مر وپینم اور انسولین شامل ہیں۔ وفاقی کابینہ کی حتمی توثیق کے بعد ڈریپ (DRAP) نوٹیفکیشن جاری کرے گا، جس سے ملک میں معیاری ادویات کی قانونی فروخت ممکن ہو سکے گی اور مریضوں کا اسمگل شدہ و غیر رجسٹرڈ مہنگی ادویات پر انحصار ختم ہو جائے گا۔ اجلاس میں وفاقی وزیرِ صحت مصطفیٰ کمال، سیکریٹری صحت اور ڈریپ حکام نے شرکت کی۔