سینیٹ قائمہ کمیٹی نجکاری کے اجلاس میں پاور پلانٹس اور ڈسکوز کی نجکاری پر بریفنگ

سینیٹر افنان اللہ کی زیرِ صدارت سینیٹ کی قائمہ کمیٹی برائے نجکاری کا اجلاس منعقد ہوا، جس میں پاور ڈویژن کے حکام نے گدو اور نندی پور پاور پلانٹس سمیت بجلی کی تقسیم کار کمپنیوں کی نجکاری سے متعلق تفصیلی بریفنگ دی۔

پاور ڈویژن حکام نے کمیٹی کو آگاہ کیا کہ گدو اور نندی پور پاور پلانٹس نجکاری کے لیے تیار ہیں اور ان پلانٹس پر حکومت مزید کوئی خرچ نہیں کرے گی۔ حکام کے مطابق دونوں پاور پلانٹس کے لیے کچھ گیس کی ایلوکیشن درکار ہے۔ گدو پاور پلانٹ کو پہلے 150 ایم ایم سی ایف ڈی گیس فراہم کی جا رہی تھی جبکہ اس وقت پلانٹ 100 ایم ایم سی ایف ڈی گیس استعمال کر رہا ہے۔ نندی پور پاور پلانٹ اس وقت آر ایل این جی پر چل رہا ہے۔

اجلاس کے دوران کمیٹی رکن سینیٹر بلال خان نے سوال اٹھایا کہ اگر ان پاور پلانٹس کی نجکاری نہ ہو سکی تو پھر کیا ہوگا؟ جس پر پاور ڈویژن حکام نے بتایا کہ ایسی صورت میں معاملہ دوبارہ کابینہ کے سامنے لے جایا جائے گا۔ سینیٹر بلال خان نے یہ بھی سوال کیا کہ کس بنیاد پر یہ سمجھا جا رہا ہے کہ نجی شعبہ ان پلانٹس کو مؤثر طریقے سے چلا سکے گا۔

پاور ڈویژن حکام نے کمیٹی کو مزید بتایا کہ بجلی کی تمام تقسیم کار کمپنیاں (ڈسکوز) نجکاری کے عمل میں شامل ہیں۔ پہلے مرحلے میں آئیسکو، فیسکو اور گیپکو کی نجکاری کی جا رہی ہے، دوسرے مرحلے میں پیسکو اور سیپکو جبکہ تیسرے مرحلے میں لیسکو، میکو اور ہیزکو کی نجکاری کا منصوبہ ہے۔

حکام نے مثال دیتے ہوئے بتایا کہ ترکیہ میں جب بجلی کمپنیوں کی نجکاری کی گئی تو اس وقت وہ 80 فیصد نقصان میں تھیں، تاہم نجکاری کے بعد وہ کمپنیاں اب منافع میں ہیں۔ پاور ڈویژن کے مطابق پاکستان میں بھی ڈسکوز کی نجکاری کے لیے تمام ضروری تیاری مکمل کر لی گئی ہے۔