کس بلڈ گروپ کے حامل افراد میں معدے کے کینسر کا خطرہ زیادہ ہوتا ہے؟

کینسر کی بڑھتی ہوئی شرح کے پیشِ نظر حالیہ تحقیق میں بلڈ گروپ اور معدے کے کینسر کے درمیان تعلق پر توجہ دی گئی ہے۔ طبی جریدے BMC Cancer میں 2019 میں شائع تحقیق کے مطابق بلڈ گروپ اے اور اے بی کے حامل افراد میں معدے کے کینسر کا خطرہ نسبتا زیادہ پایا گیا ہے۔

اعداد و شمار کے مطابق، بلڈ گروپ اے کے حامل افراد میں معدے کے کینسر کے امکانات بلڈ گروپ او کے حامل افراد کے مقابلے میں تقریباً 13 سے 19 فیصد زیادہ ہیں، جبکہ اے بی کے حامل افراد میں یہ شرح تقریباً 18 فیصد تک ہے۔

ماہرین صحت کے مطابق بلڈ گروپ اے کے حامل افراد Helicobacter pylori نامی بیکٹیریا سے متاثر ہونے کے زیادہ امکانات رکھتے ہیں، جو معدے کے کینسر کی ایک اہم وجہ سمجھا جاتا ہے، مگر اس انفیکشن کے بغیر بھی خطرہ برقرار رہ سکتا ہے۔

ماہرین نے واضح کیا کہ بلڈ گروپ خود کینسر کی واحد وجہ نہیں ہے، بلکہ مدافعتی نظام، جسمانی سوزش پر قابو پانے کی صلاحیت، خلیوں کے رابطے اور معدے میں تیزاب کی مقدار جیسے عوامل بھی بیماری کے خدشات پر اثر انداز ہو سکتے ہیں۔

معدے کے کینسر کے دیگر خطرات میں غیر متوازن خوراک، سگریٹ نوشی، شراب نوشی، موٹاپا، بعض انفیکشنز اور ماحولیاتی عوامل شامل ہیں۔ یہ بیماری خاص طور پر ایشیا، مشرقی یورپ اور لاطینی امریکا کے کچھ علاقوں میں زیادہ عام ہے، اور عمر کے ساتھ خطرہ بڑھ جاتا ہے۔ مردوں میں اس کی تشخیص خواتین کے مقابلے میں زیادہ ہوتی ہے۔

ماہرین نے عوام کو مشورہ دیا ہے کہ صحت مند طرزِ زندگی اپنائیں، متوازن غذا استعمال کریں، تمباکو نوشی سے گریز کریں اور باقاعدگی سے طبی معائنہ کروائیں۔