ویپنگ کے استعمال سے پھیپھڑوں اور منہ کے کینسر کا خطرہ

سڈنی: آسٹریلیا کے سائنسدانوں نے 2017 سے 2025 تک کے ڈیٹا کا تفصیلی جائزہ لینے کے بعد خبردار کیا ہے کہ ای سگریٹ کا استعمال جسم میں ایسی حیاتیاتی تبدیلیاں لاتا ہے جو کینسر کی بنیاد بنتی ہیں۔ تحقیق کے مطابق، ویپنگ کے بخارات پھیپھڑوں اور منہ کے خلیات میں سوزش پیدا کرتے ہیں اور انسانی ڈی این اے (DNA) کو نقصان پہنچاتے ہیں۔

تحقیق کے مرکزی مصنف فریڈی سیتاس کا کہنا ہے کہ یہ سمجھنا کہ ویپنگ مکمل طور پر محفوظ ہے، ایک خطرناک غلط فہمی ہے۔ جانوروں پر کیے گئے تجربات میں دیکھا گیا کہ ای سگریٹ کے دھوئیں کے زیرِ اثر رہنے والے چوہوں میں پھیپھڑوں کے ٹیومرز بننے کی شرح زیادہ تھی۔ ماہرین نے زور دیا ہے کہ جس طرح سگریٹ کے نقصانات تسلیم کرنے میں دہائیاں لگ گئیں، ہمیں ویپنگ کے معاملے میں وہ غلطی نہیں دہرانی چاہیے اور فوری احتیاطی تدابیر اختیار کرنی چاہئیں۔