ہارٹ سرجری کے بعد مریض حیران کن طور پر جِلد کے کینسر سے صحتیاب

سڈنی: آسٹریلیا میں دل کی سرجری کروانے والے ایک 60 سالہ شخص کے جسم سے آخری سٹیج کا خطرناک ترین جلد کا کینسر (سٹیج 4 میلانوما) مکمل طور پر غائب ہو گیا، جس نے طبی ماہرین کو حیران کر دیا ہے۔

طبی رپورٹ میں ‘مسٹر اے’ کے نام سے ظاہر کیے گئے مریض کا کینسر جگر اور ران کی ہڈی سمیت جسم کے دیگر حصوں تک پھیل چکا تھا اور وہ اس کا باقاعدہ علاج کرا رہا تھا۔ اسی دوران ایک غیر متعلقہ طبی پیچیدگی کی وجہ سے اس کی بائی پاس/دل کی سرجری کی گئی۔ سرجری کے چند ماہ بعد کیے گئے سکینز اور معائنے میں ڈاکٹروں نے دیکھا کہ اس کے جسم میں موجود کینسر کے تمام ٹیومرز مکمل طور پر ختم ہو چکے تھے۔

طبی ماہرین کے مطابق واقعے میں مزید حیرت انگیز موڑ اس وقت آیا جب دو سال بعد مریض کو شہد کی مکھی کے ڈنک سے اچانک جان لیوا الرجی لاحق ہو گئی، جبکہ ماضی میں متعدد بار کاٹے جانے پر اسے کبھی الرجی نہیں ہوئی تھی۔ ماہرین کا خیال ہے کہ آپریشن اور الرجی کا یہ ردِعمل مریض کے مدافعتی نظام (Immune System) میں آنے والی کسی غیر معمولی تبدیلی کی نشاندہی کرتا ہے جس نے کینسر کے سیلز کو خود بخود تباہ کر دیا، تاہم اس مظہر کو مکمل سمجھنے کے لیے مزید تحقیق جاری ہے۔