آسٹریلیا میں چمگادڑوں کے حملوں میں اضافہ، جان لیوا وائرس کا خدشہ

آسٹریلوی حکام نے شہریوں کو چمگادڑوں کو چھونے سے سختی سے گریز کرنے کی ہدایت کرتے ہوئے خبردار کیا ہے کہ ان کے کاٹنے اور پنجے مارنے کے واقعات میں اچانک اضافہ ہوا ہے، جس سے ‘آسٹریلین بیٹ لِسا وائرس’ (Australian Bat Lyssavirus) پھیلنے کا شدید خدشہ پیدا ہو گیا ہے۔ نیو ساؤتھ ویلز کے محکمہ صحت کے مطابق ستمبر کے آخر سے اکتوبر کے اوائل تک ریاست کے شمالی علاقوں میں چمگادڑوں کے حملوں کے 43 واقعات رپورٹ ہوئے، جو گزشتہ سال کے مقابلے میں چار گنا سے بھی زیادہ ہیں۔ ماہرینِ صحت کے مطابق یہ وائرس ‘ریبیز’ بیماری سے مشابہت رکھتا ہے اور علامات ظاہر ہونے کے بعد تقریباً ہمیشہ جان لیوا ثابت ہوتا ہے جس کا کوئی مؤثر علاج موجود نہیں۔ حکام نے شہریوں کو ہدایت کی ہے کہ کسی بھی چمگادڑ کو وائرس کا حامل سمجھا جائے اور کاٹنے یا زخمی ہونے کی صورت میں فوری طور پر زخم کو صابن و پانی سے دھو کر ایمرجنسی ویکسینیشن کروائی جائے۔