پاکستان میں تیل اور گیس کا ایک اور بڑا ذخیرہ دریافت

پاکستان میں توانائی کے شعبے کے لیے نئے سال کی خوشخبری سامنے آ گئی ہے، جہاں صوبہ خیبر پختونخوا کے ضلع ہنگو میں تیل و گیس کا ایک اور بڑا ذخیرہ دریافت ہوا ہے۔ یہ دریافت ہنگو فارمیشن، ٹل بلاک میں پاکستان پٹرولیم لمیٹڈ (پی پی ایل) اور آئل اینڈ گیس ڈیولپمنٹ کمپنی لمیٹڈ (او جی ڈی سی ایل) نے مشترکہ طور پر کی ہے۔

تفصیلات کے مطابق سرکاری کمپنیوں نے اس اہم پیش رفت سے حکومت اور شیئر ہولڈرز کو باضابطہ طور پر آگاہ کر دیا ہے۔ دریافت شدہ کنویں سے یومیہ تقریباً 16 لاکھ اسٹینڈرڈ کیوبک فٹ گیس حاصل ہونے کی توقع ہے۔ اس منصوبے میں پاکستان آئل فیلڈز اور گورنمنٹ ہولڈنگز لمیٹڈ بھی شراکت دار ہیں۔

واضح رہے کہ گزشتہ روز بھی ضلع کوہاٹ میں نشپا بلاک کے برگزئی ایکس ون کنویں سے تیل اور گیس کا نیا ذخیرہ دریافت کیا گیا تھا۔ او جی ڈی سی ایل کے مطابق ابتدائی ٹیسٹ میں یومیہ 4 ہزار 100 بیرل خام تیل اور 10.5 ملین اسٹینڈرڈ کیوبک فٹ گیس حاصل ہونے کی توقع ہے۔ اس کنویں کے لیے 5 ہزار 170 میٹر گہرائی تک کھدائی کی گئی تھی۔

توانائی ماہرین کے مطابق خیبر پختونخوا میں تیل و گیس کی مسلسل دریافتیں پاکستان کی انرجی سکیورٹی کے لیے نہایت اہم اور خوش آئند پیش رفت ہیں۔