کینسر کے خلاف جنگ جیتنے کے بعد انجلین ملک نے کیا سیکھا؟ اداکارہ کا انکشاف

پاکستان کی نامور ڈائریکٹر، پروڈیوسر اور اداکارہ انجلین ملک نے موذی مرض کینسر کے خلاف اپنی جنگ اور اس کے زندگی پر اثرات کے حوالے سے کھل کر بات کرتے ہوئے کہا ہے کہ اس بیماری کی تشخیص ان کی زندگی کا سب سے بڑا موڑ ثابت ہوئی۔ دنیا نیوز کے پروگرام ‘مذاق رات’ میں شرکت کے دوران انہوں نے انکشاف کیا کہ کینسر نے نہ صرف ان کی جسمانی صحت بلکہ زندگی کو دیکھنے کے نظریے اور ترجیحات کو بھی مکمل طور پر بدل کر رکھ دیا ہے۔ انجلین ملک کا کہنا تھا کہ اس کڑے وقت نے انہیں سکھایا کہ زندگی میں واقعی اہم کیا ہے اور کس طرح مشکل حالات مخلص اور غیر مخلص رشتوں کی پہچان کروا دیتے ہیں۔

اداکارہ نے اپنی گفتگو میں صحت کے حوالے سے آگاہی کی اہمیت پر زور دیتے ہوئے کہا کہ انسان کو اپنے جسم میں ہونے والی معمولی تبدیلیوں کو بھی نظر انداز نہیں کرنا چاہیے، کیونکہ بروقت تشخیص ہی زندگی بچانے میں کلیدی کردار ادا کرتی ہے۔ انہوں نے مزید کہا کہ کینسر کے تجربے نے انہیں جذباتی طور پر مضبوط بنایا اور اب وہ اپنی زندگی میں بامعنی تعلقات کو زیادہ اہمیت دیتی ہیں۔ انجلین ملک کے مطابق، زندگی کی غیر یقینی صورتحال کا مقابلہ کرنے کے لیے ذاتی حوصلہ، مضبوط اعصاب اور اپنوں کا ساتھ بے حد ضروری ہے، اور وہ اب اپنی زندگی کو ایک نئے اور مثبت شعور کے ساتھ گزار رہی ہیں۔