پرائمری ہیلتھ سسٹم کا متبادل ٹیلی میڈیسن نظام ہے: مصطفیٰ کمال

وفاقی وزیرِ صحت مصطفیٰ کمال نے کہا ہے کہ پرائمری ہیلتھ سسٹم کا مؤثر متبادل ٹیلی میڈیسن نظام ہے اور حکومت صحت کے شعبے کی بہتری کے لیے عملی اقدامات کر رہی ہے۔

وفاقی دارالحکومت میں ایک تقریب سے خطاب کرتے ہوئے انہوں نے بتایا کہ اسلام آباد کے گوکینہ گاؤں میں ٹیلی میڈیسن پراجیکٹ کا باقاعدہ آغاز کر دیا گیا ہے۔ ان کا کہنا تھا کہ ٹیلی میڈیسن کے ذریعے بنیادی صحت کی سہولیات عام شہریوں تک باآسانی پہنچائی جا سکتی ہیں۔

مصطفیٰ کمال نے مزید کہا کہ اسلام آباد کے 6 جبکہ کراچی کے 4 مقامات پر ٹیلی میڈیسن سسٹم نصب کیا جا رہا ہے اور وفاقی دارالحکومت کے بنیادی صحت مراکز میں یہ نظام شروع کر دیا گیا ہے۔

وفاقی وزیرِ صحت کے مطابق ٹیلی میڈیسن سسٹم شعبۂ صحت میں ایک خاموش انقلاب ہے، جو کم وسائل میں بہتر اور فوری طبی سہولیات کی فراہمی ممکن بنا رہا ہے۔