الشفاء آئی اسپتال میں نومولود کی آنکھ سے 285 گرام رسولی کامیابی سے نکال دی گئی

الشفاء ٹرسٹ آئی اسپتال کے ماہر ڈاکٹروں نے ایک نایاب طبی معجزہ کرتے ہوئے تین روزہ نومولود بچے کی آنکھ سے 285 گرام وزنی پیدائشی رسولی کامیابی سے نکال کر اس کی جان بچا لی ہے۔ اسپتال انتظامیہ کے مطابق تقریباً 3 گھنٹے جاری رہنے والی اس پیچیدہ سرجری کے بعد یہ پاکستان میں اپنی نوعیت کا پہلا دستاویزی کیس بن گیا ہے۔ ڈاکٹر طیب افغانی کے مطابق بچہ نوزائیدہ ہے اور اس کی مکمل صحت یابی کے بعد اسے مصنوعی آنکھ لگائی جائے گی تاکہ وہ نارمل زندگی گزار سکے۔ ماہرینِ چشم نے والدین کو ہدایت کی ہے کہ نومولود بچوں کی آنکھوں میں کسی بھی غیر معمولی سوجن یا تبدیلی کی صورت میں فوری مستند معالج سے رجوع کریں۔