پاکستانی ڈاکٹرز کا کارنامہ؛ قبل از وقت پیدا ہونیوالے جڑواں بچوں کی بینائی بحال

راولپنڈی کے الشفا ٹرسٹ آئی اسپتال کے ماہرینِ چشم نے ایک پیچیدہ طبی کیس میں کامیابی حاصل کرتے ہوئے سات ماہ کے جڑواں بچوں، ابراہیم اور اسماعیل کی بینائی کو مستقل طور پر ضائع ہونے سے بچا لیا ہے۔ دونوں بچوں میں آر او پی (Retinopathy of Prematurity) کی تشخیص ہوئی تھی، جو قبل از وقت پیدا ہونے والے بچوں میں اندھے پن کی ایک بڑی وجہ ہے۔

بچوں کے معالج ڈاکٹر امجد نے اس کامیاب علاج کے بعد والدین کے لیے اہم مشورے جاری کیے ہیں:قبل از وقت پیدا ہونے والے بچوں کی آنکھوں کا معائنہ پیدائش کے فوراً بعد لازمی ہے۔وہ بچے جن کا وزن پیدائش کے وقت ڈیڑھ کلو گرام سے کم ہو، ان کی بینائی کو سب سے زیادہ خطرہ ہوتا ہے۔نرسری یا انکیوبیٹر میں آکسیجن کی متوازن مقدار فراہم کرنے سے آر او پی کے امکانات کو کافی حد تک کم کیا جا سکتا ہے۔ پاکستان میں ہر سال تقریباً 10 لاکھ بچے وقت سے پہلے پیدا ہوتے ہیں، جنہیں اس خطرے کا سامنا ہو سکتا ہے۔

بچوں کی والدہ نے بروقت علاج پر ڈاکٹروں کا شکریہ ادا کرتے ہوئے اسے معجزہ قرار دیا ہے۔ واضح رہے کہ الشفا ٹرسٹ اپنے خصوصی پروگرام کے تحت اب تک 19 ہزار سے زائد بچوں کا آر او پی کے ذریعے کامیاب علاج کر چکا ہے، جس کا مقصد بچوں میں بڑھتے ہوئے اندھے پن کی شرح کو کم کرنا ہے۔