مصنوعی ذہانت کا استعمال لوگوں کو ’بھیجا فرائی‘ میں مبتلا کر رہا ہے: تحقیق

ایک نئی تحقیق میں انکشاف ہوا ہے کہ مصنوعی ذہانت کے آلات کا زیادہ استعمال لوگوں میں شدید ذہنی تھکاوٹ پیدا کر رہا ہے جسے عام زبان میں ’’بھیجا فرائی‘‘ یا برین فرائی کہا جا رہا ہے۔

بین الاقوامی جریدے Harvard Business Review کے محققین نے امریکا میں مختلف صنعتوں سے تعلق رکھنے والے 1500 ملازمین کا سروے کیا جس میں یہ جاننے کی کوشش کی گئی کہ کام کی کارکردگی اور پیداوار بڑھانے کے لیے مصنوعی ذہانت کا استعمال کس طرح اثر انداز ہو رہا ہے۔

تحقیق کے مطابق اے آئی ٹولز استعمال کرنے والے افراد میں شدید ذہنی تھکاوٹ کے آثار سامنے آئے، جس کے باعث انہیں اپنے کام پر توجہ مرکوز کرنے میں مشکلات کا سامنا کرنا پڑا۔

محققین نے اس کیفیت کو ’’بھیجا فرائی‘‘ یا برین فرائی کا نام دیا ہے۔ سروے میں شامل افراد نے بتایا کہ اس صورتحال کے دوران انہیں سر درد، فیصلہ سازی میں سستی اور ذہنی دھندلاہٹ جیسی علامات کا سامنا کرنا پڑتا ہے۔

تحقیق میں یہ بھی نشاندہی کی گئی کہ مصنوعی ذہانت کے مسلسل استعمال کے باعث ذہنی دباؤ اور تھکن میں اضافہ ہوسکتا ہے، اس لیے ماہرین نے اے آئی ٹولز کے استعمال میں توازن برقرار رکھنے اور وقفہ لینے کی ضرورت پر زور دیا ہے۔