کراچی ایکسپو سینٹر میں فارما ایشیا نمائش 2025 کے دوسرے روز کی سرگرمیاں کامیابی سے مکمل

23ویں فارما ایشیا انٹرنیشنل ایگزیبیشن اینڈ کانفرنسز کا دوسرا روز کراچی ایکسپو سینٹر میں کامیابی کے ساتھ مکمل ہوا، جس میں 13 ہزار 500 سے زائد فارما پروفیشنلز نے شرکت کی۔
سرحد چیمبر آف کامرس اینڈ انڈسٹری کے صدر جنید الطاف نے نمائش ہالز کا دورہ کیا اور فارما سیکٹر میں جاری صنعتی ترقی کو سراہتے ہوئے کہا کہ یہ شعبہ پاکستان کے مضبوط مستقبل کی ضمانت ہے۔
نمائش کے دوران ڈرگ ریگولیٹری اتھارٹی آف پاکستان (ڈریپ) نے ایک اہم اجلاس بھی منعقد کیا، جس کا مقصد ملک میں ادویات کے ٹریس ایبلٹی نظام کے نفاذ پر بریفنگ دینا اور پیش رفت کا جائزہ لینا تھا۔ اجلاس میں اس بات پر اتفاق کیا گیا کہ ڈریپ کی ریگولیٹری اپ ڈیٹس فارما انڈسٹری میں شفافیت اور معیاری نظام کو مزید بہتر بنائیں گی۔
ایس آئی ایف سی اور پاکستان فارماسیوٹیکل مینوفیکچررز ایسوسی ایشن کا اشتراک ملکی سرمایہ کاری، صنعتی ترقی اور استحکام کے نئے دروازے کھولے گا۔
فارما ایشیا نمائش کو پاکستانی فارما انڈسٹری کی عالمی سطح پر شناخت، ترقی اور خود انحصاری کی جانب ایک اہم قدم قرار دیا جا رہا ہے۔ ماہرین کے مطابق اس ایکسپو سے ادویات کی مقامی پیداوار میں بہتری کے ساتھ سستی اور معیاری دواؤں کی دستیابی میں نمایاں اضافہ ہوگا۔
عالمی کمپنیوں اور سرمایہ کاروں کے بڑھتے اعتماد سے نہ صرف صنعتی ترقی کو تقویت ملے گی بلکہ معاشی استحکام میں بھی اضافہ ہوگا۔ فارما ایشیا کا یہ پلیٹ فارم کاروباری روابط، برآمدات اور سرمایہ کاری کے نئے مواقع پیدا کرنے میں اہم کردار ادا کرے گا