پاکستان میں ٹیکسٹائل سیکٹر میں جدید ٹیکنالوجی کے فروغ میں تیزی

ٹیکسٹائل ایشیا نمائش 2025 کے سلسلے میں پاکستان کی ٹیکسٹائل صنعت میں اہم پیشرفت سامنے آئی ہے، جب کہ ایس آئی ایف سی کے مؤثر اقدامات سے ٹیکسٹائل سیکٹر میں جدید ٹیکنالوجی کا فروغ تیزی سے جاری ہے۔ اس سلسلے میں اکتیسویں ٹیکسٹائل ایشیا انٹرنیشنل نمائش و کانفرنسز 22 سے 24 نومبر 2025 تک لاہور ایکسپو سینٹر میں منعقد ہوں گی۔
جنوبی ایشیا کی سب سے بڑی ڈیجیٹل ٹیکنالوجی، ٹیکسٹائل اور گارمنٹ مشینری نمائش ای کامرس گیٹ وے پاکستان کے زیرِ انتظام ہوگی۔ اس سال نمائش کا مرکزی موضوع ٹیکنالوجی قدر میں اضافے کا محرک” رکھا گیا ہے۔
نمائش میں دو ہزار سے زائد برانڈز کی شرکت اور ہزاروں تجارتی زائرین کی آمد متوقع ہے۔ ٹیکسٹائل ایشیا 2025 میں پندرہ سے زائد ممالک بشمول چین، ترکی، جرمنی، اٹلی، جاپان، کوریا، امریکہ اور فرانس کے وفود شریک ہوں گے۔
نمائش میں پاکستان کی آئی ٹی اور ٹیکنالوجی انڈسٹری کے فروغ کے ساتھ ٹیکسٹائل سیکٹر کو جدید، مسابقتی اور ٹیکنالوجی پر مبنی ہب میں تبدیل کرنے پر خصوصی توجہ دی جائے گی۔اس کے علاوہ 22 نومبر کو ایکو ٹیکسٹائل کانفرنس 2.0 بھی منعقد ہوگی، جس کا موضوع “ذمہ دار ٹیکسٹائل شفٹ” رکھا گیا ہے۔ اس کانفرنس میں عالمی ماہرین اور پالیسی ساز تجدید پذیر توانائی، سرکلر اکانومی اور ڈیجیٹل اصلاحات پر تفصیلی تبادلہ خیال کریں گے۔منتظمین کے مطابق یہ ایونٹ پاکستان میں صنعت کے لیے ایک جامع اور اہم پلیٹ فارم ثابت ہوگا جو صنعتی جدت، عالمی روابط اور کاروباری مواقع کو فروغ دے گا۔

ایس آئی ایف سی کے تعاون سے ملک بھر کی صنعتوں میں تیزی سے جاری ڈیجیٹل تبدیلی پاکستان کی ویلیو ایڈڈ ٹیکسٹائل کو مزید مضبوط اور عالمی سطح پر مسابقتی بنا رہی ہے