چینی کے وافر ذخائر، قیمتیں کنٹرول میں ہیں: اسحاق ڈار

نائب وزیراعظم و وزیر خارجہ سینیٹر محمد اسحاق ڈار کی زیر صدارت چینی کے ذخائر اور قیمتوں سے متعلق ایک اہم اجلاس منعقد ہوا، جس میں ملک بھر میں چینی کی وافر دستیابی اور قیمتوں میں کمی کے رجحان پر اطمینان کا اظہار کیا گیا۔

اجلاس سے خطاب کرتے ہوئے اسحاق ڈار نے کہا کہ ملک میں چینی کی سپلائی صورتحال مستحکم اور مکمل طور پر کنٹرول میں ہے۔ انہوں نے ہدایت کی کہ چینی کی قیمتوں میں استحکام برقرار رکھنے کے ساتھ ساتھ کسانوں کو گنے کی مناسب اور منصفانہ قیمت بھی دی جائے، کیونکہ کسانوں کے مفادات کا تحفظ حکومت کی اولین ترجیح ہے۔

اجلاس میں گنے کے کاشتکاروں کو منصفانہ معاوضہ یقینی بنانے پر زور دیا گیا۔ وزیر قومی غذائی تحفظ نے آن لائن اجلاس میں شرکت کی جبکہ وزیر اعظم کے معاون خصوصی طارق باجوہ بھی اجلاس میں شریک تھے۔

متعلقہ وزارتوں اور محکموں کے سینئر افسران نے بھی اجلاس میں شرکت کی، جس میں اس امر کا اعادہ کیا گیا کہ حکومت چینی کی قیمتوں اور دستیابی پر کڑی نظر رکھے ہوئے ہے۔