لاہور کے سیوریج سے پولیو وائرس کی تصدیق

لاہور شہر کے سیوریج سسٹم میں پولیو وائرس کی دوبارہ موجودگی کی تصدیق کے بعد بیماری کے پھیلاؤ کے خدشات برقرار ہیں، جس سے انسدادِ پولیو مہمات کے باوجود وائرس کی مسلسل گردش کا عندیہ ملتا ہے۔

محکمۂ صحت کے ذرائع کے مطابق سال 2025 کے اختتام پر جمع کیے گئے سیوریج سیمپلز میں پولیو وائرس مثبت پایا گیا، جو اس امر کی نشاندہی کرتا ہے کہ شہر میں وائرس کی سرگرمی مکمل طور پر ختم نہیں ہو سکی۔

پنجاب ہیلتھ ڈیپارٹمنٹ کے حکام نے بتایا کہ آؤٹ فال روڈ اور گلشنِ راوی کے علاقوں سے حاصل کیے گئے سیمپلز میں پولیو وائرس کی تصدیق ہوئی ہے، تاہم ملتان روڈ اور محمود بوٹی سے لیے گئے سیمپلز میں وائرس موجود نہیں پایا گیا۔

ماہرین کے مطابق یہ سیمپلز معمول کی نگرانی (روٹین سرویلنس) کے تحت لاہور کے سیوریج نیٹ ورک سے جمع کیے گئے تھے، تاکہ شہر میں پولیو وائرس کی ممکنہ موجودگی اور پھیلاؤ پر مسلسل نظر رکھی جا سکے۔

صحت کے حکام نے والدین اور سرپرستوں سے پُرزور اپیل کی ہے کہ وہ اپنے بچوں کی پولیو سے بچاؤ کی ویکسینیشن ہر صورت مکمل کروائیں، کیونکہ بروقت حفاظتی ٹیکے ہی اس موذی مرض کے پھیلاؤ کو روکنے کا مؤثر ذریعہ ہیں۔