کراچی: بچوں میں پیٹ کے کیڑوں کے خاتمے کی 6 روزہ مہم 5 جنوری سے شروع ہوگی

شہر میں بچوں کو پیٹ کے کیڑوں سے محفوظ رکھنے کے لیے 6 روزہ خصوصی مہم کا آغاز کیا جا رہا ہے، جس کے دوران 60 لاکھ بچوں کو پیٹ کے کیڑوں سے بچاؤ کی ادویات دی جائیں گی۔

محکمہ صحت کے مطابق اس مہم کے تحت 5 سے 14 سال تک کی عمر کے بچوں اور بچیوں کو خوراک دی جائے گی، جبکہ 15 سے 18 سال تک کی عمر کی لڑکیوں کو بھی اس مہم میں شامل کیا گیا ہے۔ مہم سرکاری و نجی تعلیمی اداروں کے علاوہ گھروں تک بھی چلائی جائے گی تاکہ زیادہ سے زیادہ بچوں کو کور کیا جا سکے۔

اس مہم میں 10 ہزار سے زائد تربیت یافتہ ہیلتھ ورکرز حصہ لیں گے جو اسکولوں اور گھروں میں جا کر بچوں کو دوا فراہم کریں گے۔

پاکستان ڈی وارمنگ انیشیٹیو کے سینئر پروگرام منیجر قدیر بیگ نے بتایا کہ یہ کراچی میں ڈی وارمنگ مہم کی دوسری لانچنگ ہے اور اس کا آغاز آئندہ ہفتے کیا جائے گا۔ ان کا کہنا تھا کہ یہ ایک بڑا اور منظم پروگرام ہے، جس کے تحت اب تک ملک بھر میں 5 کروڑ بچوں کو کور کیا جا چکا ہے۔

قدیر بیگ کے مطابق اس قومی مہم میں تقریباً ڈھائی لاکھ اساتذہ اور ہیلتھ ورکرز حصہ لیتے ہیں، جبکہ 2 لاکھ 37 ہزار اسکول اس پروگرام کا حصہ بن چکے ہیں۔ ان کا کہنا تھا کہ پیٹ کے کیڑوں سے بچاؤ بچوں کی صحت، نشوونما اور تعلیمی کارکردگی کے لیے نہایت اہم ہے، اسی لیے اس مہم کو بھرپور انداز میں جاری رکھا جا رہا ہے۔