سٹاک ایکسچینج میں ایک اور ریکارڈ! ایک لاکھ 78 ہزار پوائنٹس کی حد بھی عبور

پاکستان اسٹاک ایکسچینج میں مثبت معاشی اشاروں اور سرمایہ کاروں کے بڑھتے اعتماد کے باعث ریکارڈ پر ریکارڈ قائم ہونے لگے ہیں۔ کاروباری ہفتے کے پانچویں اور آخری روز کاروبار کے آغاز پر مارکیٹ میں زبردست تیزی دیکھی گئی۔

ٹریڈنگ کے دوران 1800 سے زائد پوائنٹس کے اضافے کے ساتھ کے ایس ای 100 انڈیکس تاریخ کی نئی بلند ترین سطح ایک لاکھ 78 ہزار 253 پوائنٹس تک پہنچ گیا، جس کے بعد مارکیٹ میں جوش و خروش کی فضا قائم ہو گئی۔

یاد رہے کہ گزشتہ کاروباری روز کے اختتام پر بھی مارکیٹ شاندار کارکردگی کا مظاہرہ کرتے ہوئے 2301 پوائنٹس کے اضافے کے ساتھ ایک لاکھ 76 ہزار 355 پوائنٹس پر بند ہوئی تھی۔

ماہرین کے مطابق مثبت معاشی پالیسیوں، بہتر مالیاتی اشاریوں اور سرمایہ کاری کے سازگار ماحول کے باعث اسٹاک مارکیٹ میں تیزی کا رجحان برقرار رہنے کا امکان ہے۔