شوگر ملوں کی مانیٹرنگ ڈیوٹی سے غیر حاضر رہنے والے چھ ایف بی آر اہلکار معطل

فیڈرل بورڈ آف ریونیو (ایف بی آر) نے شوگر ملوں کی مانیٹرنگ ڈیوٹی سے غیر حاضر رہنے پر 6 اہلکاروں کو معطل کر دیا ہے۔

ایف بی آر کے ترجمان کے مطابق مذکورہ اہلکاروں کو شوگر کی پیداوار کی مؤثر، شفاف اور بلا تعطل نگرانی کو یقینی بنانے کے لیے تعینات کیا گیا تھا۔ تاہم ان کی غیر حاضری کا انکشاف لارج ٹیکس آفس (ایل ٹی او) لاہور کی جانب سے کی جانے والی معمول کی مانیٹرنگ کے دوران ہوا۔

ترجمان نے بتایا کہ ایل ٹی او لاہور نے غفلت اور لاپروائی کی سنگینی کے پیش نظر متعلقہ اہلکاروں کے خلاف تادیبی کارروائی شروع کرنے کی سفارش کی، جس پر فوری طور پر معطلی کے احکامات جاری کر دیے گئے ہیں۔

ایف بی آر حکام کا کہنا ہے کہ ادارہ اپنی تمام فیلڈ فارمیشنز میں نظم و ضبط، دیانتداری اور پیشہ ورانہ معیار کو برقرار رکھنے کے لیے پرعزم ہے، جبکہ فرائض میں غفلت، بدانتظامی یا تفویض کردہ ذمہ داریوں کی عدم تعمیل پر قانون کے مطابق سخت کارروائی عمل میں لائی جائے گی۔